LÍKT OG MÁLVERK
Líkt og málverk
minningar vorlangra daga
himinblá augu
æska
kossar
vonir.
Augu horfast í augu
hendur sem leiðast
sumarið okkar
tárin
húmið
haustið.
Marglitir skuggar
birtu er bregður á glugga
bergmál af vori
lífið
gleðin
ástin.
ÚR REGINDJÚPI
Móahrjóstur, mosagróður
í miðju hrauni, að fjallabaki.
Kindagötur, gamlar slóðir
glóir kvika und helluþaki.
Eldjötuninn aflið reynir
ógnarkraftar skjálfa, þjóta.
Logahrömmum ljótum beinir
í loftið upp, að brjóta, brjóta.
Það sem fyrr var beislað, bundið
brýst nú fram úr regindjúpi.
Kveður við um kvikusundið
undir Keilis þagnarhjúpi.
Fagradalsins fjallið græna
finnur bálið magnast, renna.
Allra augu á það mæna,
örlög hörð að springa, brenna.
Töfraljós í lofti loga
lyfta anda mínum hærra.
Glampa slær á vík og voga
verður lífið meira, stærra.
ÞÖGUL NÓTT
Þögul nótt við úthaf ystu stranda
umlukt grænum friði, dökkum sandi.
Sofa hús og halla lúð mót bakka,
hrossapuntur, sóley, flugnasveimur.
Hlaðvarpinn hvar skel og leggur liggja
lítil barnagull úr týndum heimi.
Veðruð þilin, þokkamjúkt við bryggju
þylur aldan sænum forna bálka.
ÁN TITILS
Á línunni
milli lífs og dauða
þú stóðst þar
og gekkst einu skrefi
of langt
SVEITIN I
Rigningin merlar á rúðunni
rútubíllinn hverfur
inn í þokuna
ég sit fullorðinslega
barn með heimþrá
Við brúsapallinn bíður amma
ljósin á traktornum
tvær stjörnur
ÁN TITILS
Horfðu
inn í augu mín
á meðan
svo ég sjái
að þú sérð
að ég sè
þig